早幾日喺電視新聞見到Pinky嫲嫲，好似見到一個識咗好耐嘅熟朋友上鏡咁，即刻會心微笑，然後同我男朋友講起，佢話都諗起可能係我提過嘅Blog友，但係佢記錯咗以為係金婆婆，真搞笑！網上嘅世界同現實生活突然交疊，個感覺好奇妙，兼且又提一提我返下過嚟！

見到咁多人留言話掛住我，真係好感動好開心呀！現實生活成日聽到「人走茶涼」，反而網上面可以咁長情：）

其實我好想逐個回，又好想好似以前咁成日去你哋度留下腳毛，但係呢排實在係好忙，而且我應承過自己，既然已經搵返我嘅目標，就一定要全力以赴做到最好！既然係咁，不如大家原諒我暫時唔覆留言，淨係得閒返下嚟擺低幾隻字，推砌返一篇半篇啦，咁樣可能負擔冇咁重（原諒我咁懶呀）

其實每一個blog友，都好努力咁過緊自己嘅生活，喺你哋各自嘅Blog度，見到你哋過緊咩嘢生活、有咩興趣、最近嘅心情、經歷.....每一個Blog都係一個獨立嘅世界，一個屬於佢主人嘅獨特世界！只要係固定嘅觀眾群，一定會熟知果個Blog主嘅特性，雖然Blog與Blog之間可能係兩個完全唔同嘅世界，喺現實生活中，兩個Blog主亦可能彷如兩條平衡線毫無交會嘅地方，但係喺網上面，我哋就係遇上咗，分享咗彼此嘅世界！

唔知係咪呢個原因，所以我疏懶咗咁多，都仍然有人嚟探我呢？

我淨係知道，當我覺得不安，去你哋個Blog去睇睇，我又覺得安心返－－我所認識嘅果啲人，仍然係咁樣好努力咁生活緊呀！我都唔可以輸俾佢哋！雖然現實生活我哋可能冇見過，雖然網上嘅交往可能因為繁忙嘅工作會暫緩咗落嚟，但係你哋仍然喺度呀！識到你哋，真係好！