各位關心我嘅朋友，唔好意思呀，做咗失蹤人口添.....其實係咁嘅： 

2007年嘅四月，完全出乎我意料之外，喺我嘅人生之中，出現咗一啲翻天覆地嘅變化，亦係我掉低個Blog咁耐嘅主因。

呢一個月發生咗啲好戲劇化嘅激烈場面，不過主要都係個人內心掙扎，內心獨白要講真係水蛇春咁長，不過當一切順其自然咁安頓咗落嚟之後，亦都冇需要再爭論－－我已經立定主意，我嘅前路應該點樣走，我嘅人生應該點樣行.....

事實上我開呢個Blog嘅時候，正係經歷我人生之中嘅迷茫期，好需要搵個地方去解決我嘅內心困擾，將負面情緒釋放。認識各位Blog友，係意料之外嘅收獲，雖然有好幾次受邀出席聚會，我都因為工作無法出席，但係大家就好似識咗好耐嘅朋友，耐不耐會互相探訪、虛寒問暖，令迷茫期嘅我深感安慰。

我呢個迷茫期都算長呀，差唔多年幾兩年，我都諗緊幾時會爆煲？最後會以乜嘢形式去突破？好徬徨，好驚轉變之後會更差或者唔適應，但又好期待新局面嘅來臨。結果轉捩點喺我最忙嘅時候來臨，係一個意想不到嘅轉捩點，一切又好似冥冥之中早有暗示，所有連鎖反應加加埋埋結果導致今日嘅局面－－我嘅新世界，來臨！！

哈，講到好似點驚天地泣鬼神咁，其實一般局外人睇嚟，我可能同以前冇乜分別，做嘅嘢冇乜大變動。但係我心知，我嘅世界已經唔同咗，因為我嘅「心」已經唔同咗！我嘅前路、我嘅人生，我好清楚我係冇辦法主宰，因為我揀咗一條好動盪充滿未知變數嘅路嚟行；但係有一樣嘢我係可以主宰嘅，就係我個「心」－－我嘅信念同諗法！

一直困擾住我嘅，係條路有幾難行，我要行落去到底要妥協幾多，放低幾多自己－－其實呢個諗法好荒謬，我就係唔想妥協於現實、唔想放棄做自己，至揀呢條路；咁點可以為咗喺呢條路上面走落去，而做我本來唔想做嘅嘢？如果要妥協於現實、放棄做自己，倒不如行返條康莊大道會舒服容易得多？所以，路，仍然難行，但係要用我自己嘅方法去行，人哋因為路途崎嶇點樣揀咗條歪路嚟行係人哋嘅事。

困擾就係咁，解開咗喇！我只要做返自己，信自己，就ok喇！行唔行到落去，行到有幾遠，都唔重要喇－－只要每一步我都係憑我自己嘅信念，走落去！

（係咪唔知我up乜呢？唔緊要，我自己都唔係好清楚，不過係覺得自己成個人成個mood唔同咗咁囉！好似做咗一個全新嘅人，所以要加倍努力衝刺，正所謂一鼓作氣吖嘛。咁呢個竇口呢.....可能暫時會疏啲打理喇，不過有時間我都會偷偷地探下大家架，正如我呢篇個題目咁講，明日係分定合都係未知之數，隨緣喇.....）