成日同人講：「我三歲果陣，志願係做畫家，一邊喺巴黎流浪一邊喺街邊幫人畫畫為生！」
究竟呢個夢想係咪三歲果陣諗嘅呢？定係記憶出咗問題呢？我真係唔記得。（至少果陣我已經知道巴黎出好多畫家，應該係幾多歲呢？）
反而諗諗下，我個念頭會唔會係睇咗呢個節目至出現嘅呢？總之唔係因佢而起，至少睇完一定加深咗我對巴黎嘅浪漫印象，增加咗去果度流浪嘅願望。講緊嘅係張國榮嘅音樂特輯＜日落巴黎＞，女主角係鍾楚紅、張曼玉，導演係吳宇森，真係卡士強勁呀！記得當時我應該鍾意張曼玉果種清純feel多啲嘅，不過對紅姑喺呢個特輯度嘅打扮卻係印象難忘－－記得佢當時披散頭髮，衣著隨意有啲嬉皮士feel，夾住條長長嘅法國麵包喺條街度行，瀟灑有型之中又勁似藝術文化人－－自此之後，我硬係覺得藝術工作者應該係咁著嘅，就算俾人話勁娘我仍然堅持；而且往後好長一段日子，我迷上咗啃法國長麵包（小學朝朝愛嚟做早餐），人人都話勁硬勁難食我卻樂在其中，只為扮藝術家！無法啦，其實最想都係去法國流浪啫，去唔到喺香港食下法國麵包叫做望梅止渴囉。
想搞藝術喎，親朋戚友一早告戒過我啦，其實我都一早預咗：最多咪懷才不遇、潦倒一生囉！我預咗晚年做流浪漢，瞓天橋底，有時經過啲天橋都會睇定邊個位風涼水冷啲。一套＜南海十三郎＞，將我呢個想像又浪漫化，搞到我每逢喺街撞到流浪漢都會想像一下佢前半生會唔會係個鬱鬱不得志嘅天才呢？仲有，我哋出咗個街頭書法家曾灶財喎，可能流浪真係搞藝術嘅最高境界，當你成為藝術家咯，咪就係變咗流浪漢囉！以天為被、以地為床，都幾型吖。
其實我係真係有叫做流過浪嘅。「去流浪」，感覺又型又浪漫，因為通常你只係聽返嚟或者隔住個螢光幕睇人哋。當你自己去試，可能最大感覺係成日咩住袋行李又重又唔方便、搵唔到地方瞓同沖涼又臭又狼狽、盲盅盅睇地圖費時失事、人生路不熟盪失路好徬徨.....當然，同時柳暗花明又一村可能亦會好驚喜，認識到唔同地方嘅朋友、遇到好心人幫忙、撞到識講廣東話嘅香港人等奇遇，其實都有好多呢。
記得我中學畢業果年去咗蒙古（雖然其實係跟團，不過果個係個只收後生仔嘅走難團，路途崎嶇兼要瞓火車同蒙古包，都有少少流浪feel架）；大學畢業就真係咩背囊同幾個朋友自己去咗歐洲，瞓過火車站、偷偷地潛入人哋間大學個電視房度瞓過、亦都試過用水樽去公廁裝水到廁格「沖涼」，真係名副其實嘅流浪呀！
), 我唔係流浪, 而係貪佢又平又容易飽~~~當然, 我都好鐘意食麵包啦~ hahaha~~~
