唔覺唔覺又偷咗咁多日懶添，等我記低呢幾日嘅點滴心得同啟發先。

１．邊個掌握到民意，邊個就係民心所向，儘管民眾係盲目嘅。所以公關同包裝真係好重要，呢個係一個Marketing行先嘅世界。（＜英女皇＞看後感及工作心得）

２．咩嘢係偶像？啲Fans其實並唔認識佢，只係從佢嘅公眾形象找尋優點，然後加入主觀想像無限放大。一個有血有肉嘅真人，限本無可能咁完美，但你唔好嘗試說服果啲盲目嘅Fans佢偶像其實都係一個有缺點有脾氣嘅凡人，就算你真係佢偶像嘅親朋戚友，就算你只係講出真相，亦只會惹嚟民憤同一身蟻，點解要做傻事呢。（＜英女皇＞看後感及工作心得）

３．一個好導演，最緊要有風格，同好好控制節奏。音樂劇係好難拍架，比普通電影更難駕馭，節奏！節奏！節奏！仲要型呀！＜Dreamgirl＞真係令人好失望，＜Chicago＞實在高班太多喇，就連唔三唔四嘅＜情陷紅磨坊＞都有驚喜過佢！（＜Dreamgirl＞看後感）

４．香港好導演唔一定要好大喜功爭去荷里活，中港合拍電影唔一定唔湯唔水假大空，其實香港係中國一部份，香港電影人唔好再將自己框死喺香港啦，我覺得北上發展真係有sense有出路！可以拍嘅題材多的是，唔好淨係諗黑社會警匪得唔得？（＜姨媽的後現代生活＞看後感）

５．好耐冇睇過港產電影／電視，唔敢睇，冇眼睇。雖然自己做緊，但係覺得好辛苦，同成行好似格格不入咁，理想同現實相差太遠喇......其實何苦迫自己睇／學做一啲唔係自己杯茶嘅作品？視線唔好咁窄啦，睇遠啲！好彩今晚入場睇咗個香港導演嘅作品，仲要想睇果場Full house，要買下一場。好多笑位，仲有掌位呀！完場果陣我直頭想拍掌，而且睇晒roller至捨得走。個心舒服晒，仍然有值得學習嘅本土榜樣呀！許鞍華好野！（＜姨媽的後現代生活＞看後感）

６．坐喺戲院入面被感動，因為我係觀眾，自然沉醉喺人哋嘅成果入面。但係我突然諗到，創作人最沉醉果陣，應該係喺佢創作緊嘅過程度？過程係屬於創作人嘅，成果係留返俾觀眾，大家enjoy嘅係唔同階段，我應該牢牢緊記呢樣野！創作完成咗，創作人應該功成身退，太過沉溺喺成果嘅成敗得失毀譽之中，實屬不智。有堅持有要求，應該喺創作階段提出，馬後炮或者反駁自辯都係於事無補。有精力有時間，不如努力埋首下一個作品。（＜姨媽的後現代生活＞看後感）

７．冇人會俾面你，直到你成為一個人物。呢個世界並唔會論功行賞，商業社會把秤，量嘅係你個名有幾賣錢，唔係你出咗幾多力或有幾多實力。優先會俾人刪除、忘記、忽視，因為我係nothing；如果個名加到飛加到收視，冇做過野都會加你落去仲排頭位添！唔好怨，捱啦，累積實力，值到成為獨當一面嘅人物，咁你以前得唔到嘅都會返返晒嚟。（工作心得）

８．原來，冇得升，可以係因為你太做得野。電視B幾位高層對某PA王有口皆碑，同行好奇以該PA功力應該一早升得，但係原來因為行內太缺PA，升咗佢就冇乜好PA用，所以PA王捱足6年，依然係PA！（工作心得）