驚蟄啱啱過咗冇耐，其實我阿媽叫咗我幾次落街打小人，但係後生遙遙一個女仔人家，呢啲嘢點做呀？（如果住近鵝頸橋，都會考慮落街俾錢啲阿婆駛嘅）結果冇理佢。
只不過係提過下工作上嘅不愉快事件，加上今年又犯太歲，阿媽就已經叫我去打小人。唉，其實我身邊真係小人氾濫，不過呢啲嘢自己受咗就算啦，無謂四圍唱開，搞出更多是非，令到更多人唔開心。
朋友話我身處果個係是非圈，其實越多是非、越多小人，代表我越多人注意，更加有前途喎。諗下都有道理，我就冇咁好心機金睛火眼去搵人錯處恃機插人喇，果啲咁鬼留意我(有咩可插)嘅人，我係咪真係咁有吸引力值得你咁留意啫？咁鬼抬舉我，真係多謝晒！（真心多謝架，總好過冇人提，或者一味讚，到時要進步都唔知從何改起）
講返我阿媽，其實我覺得佢啱入娛樂圈多過我，因為佢真係極度迷信(同好多圈中人一樣)。除咗叫我打小人，仲喺我間房搞埋啲乜嘢風水陣！
一向合作最多果間公司，某高層又同我講，話今年算命師父算到呢間公司有大地震喎，而且老細超級信佢！咁....會唔會震到我又少梗個靠山呢？定震完前途更光明呢？風水佬呃你十年八年，呢個批命今年之內就會揭曉，希望明天會更好啦。
睇黃子華楝篤笑，記得佢講過(大約)：主宰唔到自己前途命運嘅民族，先至會篤信風水命理。點解中國人咁鍾意算命？點解娛樂圈中人咁信算命？明晒。
近日風水節目大行其道，無論你打開報紙、雜誌、電台、電視，梗有一個喺左近。甚至連「才子」都加入主持，風水佬婚禮更可登上娛樂版？！大家都迷茫，唯有求其搵啲嘢信啦。
相士話今年文昌星入娛樂圈，咁我希望今年理性文明實力創意會抬頭，愚昧無知八掛是非早走早著啦。
